Qahva kun davomida kishiga quvvat beruvchi eng ommabop tonggi ichimlikdir. Ko‘pchilik tongni shoshilib ichiladigan tayyor qahva bilan boshlasa, uning haqiqiy shinavandalari qahvani yangi maydalangan donachalari va sekin yonayotgan olovning sehrisiz tasavvur qila olmaydi. Barcha ichimliklar orasida qahvani eng ko‘p xush ko‘ruvchilar uchun ushbu maqolada keltirilgan tavsiyalar foydali bo‘lishiga ishonchimiz komil.
Qahva xushxo‘rligining sirlari
Haqiqiy qahva uchun eng muhimi toza suvdan foydalanishdir. Bu vaziyatda qaynatilgan yoki vodoprovod suvi to‘g‘ri kelmaydi. Filьtrlangan yoki butilkadagi suvdan foydalanish mumkin. Uni sovuting. Shunda sekin isish jarayonida u qahva donalarining ta’mini ko‘proq o‘ziga singdiradi.
Qaynatish oldidan maydalangan qahva ichimlikning ta’mi va xushbo‘y isini ochib beradi. Qahva solingan idishni zich berkiting, ochiq holda turgan qahva bir hafta ichida o‘zining xushbo‘yligini yo‘qotadi. Turli mamlakatlarda ishlab chiqarilgan qahvalar o‘zining ta’mi bilan bir-biridan farqlanadi. Uning donalari qanchalik ko‘p qovurilgan bo‘lsa, ichimlik ham shunchalik ko‘proq o‘tkir va achchiq bo‘ladi. Uning bir necha xilini olib, o‘zingiz aralashtirib olishingiz ham mumkin. Asosiysi siz tanlagan qahva a’lo darajadagi sifatga ega ekanligiga e’tibor qarating.
Turka — qahva qaynatish uchun ideal idish hisoblanadi. Biz sizga konus shaklidagi turkani tanlashni tavsiya etamiz. Uning keng tubi qahvaning tezroq isishi, tor bo‘g‘zi esa uning xushbo‘yligini saqlab qolish imkonini beradi.
Qahva tayyorlash jarayoni
100 ml suvga taxminan 8 gramm qahva kerak bo‘ladi.
Qahva donalarini maydalaganingizdan so‘ng ularni turkaga joylang. Unga bir chimdim ziravor (maydalangan zanjabil, dolchin yo kardamon) yoki tuz qo‘shish mumkin. Sovuq suvni turkaning eng tor qismigacha quyib, uni past olovga qo‘yish lozim. Shoshilmang. Qaynatish jarayoni qanchalik sekin bo‘lsa, ichimlik shunchalik to‘yingan bo‘lib chiqadi.
Qahva ko‘tarila boshlagandan idishni olovdan oling. Uni taxminan 30 soniyadan so‘ng yana olovga qo‘ying. Suyuqlik uch marta ko‘tarilishi kerak. Qahva qaynab ketmasligiga ahamiyat bering. Uning ko‘pigi ko‘tarila boshlagandan olovdan olish lozim. Ko‘pik toshib ketmasligi kerak, aks holda uning xushbo‘yligi yo‘qoladi. Shu sababli uni qaynatish davomida oshxonani tark etmang.
Jarayonni yakunlash chog‘ida qahvani mayda elakchadan o‘tkazishingiz mumkin. Shundan keyin jarayonning eng yoqimli qismi keladi. Tayyor qahvani finjonga solib, uning ajoyib ta’midan bahramand bo‘ling!